Генералниот секретар на расипничката Влада на СДСМ, Драги Рашковски, со денови не излегува пред јавноста, упорно молчи за непотизмот што го шири низ државните институции. Драги Рашковски изгледа нема намера да одговори на прашањата кои ги поставува македонската јавност, но нема ни намера да си поднесе оставка како Генерален секретар на Владата на Република Македонија, истакна во неделата Светлана Јакимовска од ВМРО-ДПМНЕ.
„Непотизмот од неговото работење не може да се прикрие ниту заташка, со повлекувањето на неговата баба, Елена Начевска, мајка на неговата сопруга Вероника Начевска од позицијата претседател на Комисијата за жалби. Во исто време се повлече и неговиот кум, Дејан Костиќ кој Рашковски го ангажираше за адвокат на Генералниот секретаријат на Владата и покрај тоа што Владата има правна служба. Овие лица треба да ги вратат народните пари кои ги испумпаа по основ на плати и хонорари од Буџетот на Република Македонија“, истакна Јакимовска.
Според неа, поради ваквите брутални прекршувања на законските одреби, крајно време е Рашковски треба да покаже „барем ронка морал“ и да си поднесе неотповиклива оставка од функцијата како владин претставник во Македонски Телеком, на кој самиот незаконски се назначил и самиот си го потпишал решението.
„Рашковски брутално без срам го крши законот и затоа око не му трепнува. Согласно член 18 од Законот за спречување на судир на интереси, Драги Рашковски не може да биде член на управен или надзорен орган во трговско друштво, јавни претпријатија, агенции, фондови, но и сите други организациони облици со доминантен државен капитал, што значи дека Законот за спречување судир на интереси не дозволува Генералниот секретар на владата, Драги Рашковски да биде назначен и за владин претставник во Собранието на акционери на Телеком“, додаде претставничката на ВМРО-ДПМНЕ.
Оваа влада, додаде Јакимовска, стана синоним на корумпираност и криминогеност. Но затоа на 15-ти октомври граѓаните ќе ја казнат оваа влада. Социјалдемократскиот сојуз убедливо ќе биде поразен.
