Петнаесетгодишен ученик пукал од пиштол во средно училиште во вторникот во западниот дел од американската сојузна држава Кентаки, при што убил двајца колеги од училиштето и ранил други 12 пред да биде уапсен, соопштија локалните власти и полицијата.
Пукањето во средното училиште, коешто го посетуваат 1.146 ученици, во градот Бентон, главен град на округот Маршал Каунти, започнало околу 8 часот утрото по локално време, според изјавата на гувернерот Мет Бевин и државната полиција.
Четиринаесет ученици биле погодени во пукањето, двајца од нив починале. Петнаесетгодишна девојка умрела на самото место на нападот, а петнаесетгодишно момче е прогласено мртво во болницата, изјави Бевин на прес-конференцијата неколку часа по нападот.
Пет од дванаесетте ранети ученици се пренесени во иста болница, а други пет ученици имаат повреди кои не се од куршуми.
Полицијата соопшти дека насилството избило кога вооружен петнаесетгодишник влегол во училиштето и започнал да пука од пиштол. Гувернерот Бевин рече дека е уапсен „на ненасилен начин“.
Властите засега не располагаат со никакви други поединости за овој инцидент.
