Книжевна беседа во чест на 80 години од рациновите „Бели Мугри“ одржа денеска професорката Кристина Николова во медиотеката на библиотеката „Гоце Делчев“ во Велес.
Малата црвена книга на Рацин која преку стихови го повикуваше народот на борба против ропството и угнетувањето беше отпечатена на 25 ноември 1939 година во четири илјади примероци во малото гратче Самобор во Хрватска во печатницата на Драгутин Шпулер. Рациновите „Бели Мугри“ е најпреведуваната македонска стихозбирка на многу јазици во светот.
– Црвен наслов на корицата, а над него името К. Рацин. Импресивен симболичен наслов што означува премин од темнината, од тешкото ропство што го носеше неговиот народ кон светлината на денот што се раѓа, чекорење кон новиот ден на деновите, сликовито појаснува Коробар. Извонредно крупен настан во културната и политичката историја на македонскиот народ и пошироко. Тоа е врвен дострел на неговото творештво. Дело неделиво од неговиот живот и неговото класно и националноопределување, проценува Перо Коробар, потсети Николова.
Додаде дека веднаш по печатењето е забранета, но таа веќе била во рацете на читателите и тоа во поширокиот регион, а најмногу во земјава.
Николова потсети дека важен настан на годинашните блескави Рацинови средби беше и промоција на книгата „Бели мугри на словенски јазици“, подготвена од Раде Силјан како збогатено издание на она од 2008 година.
– Со објавувањето на стихозбирката „Бели мугри на словенски јазици“ од основоположникот на современата македонска литература, ја одбележуваме осумдесетгодишнината од нејзиното печатење во 1939 година во Самобор, Хрватска, ќе рече Раде Силјан, приредувач на ова издание, и автор на предговорот кон издание, потсети Николова.
Денешната беседа беше збогатена со читање на стихови од рациновите „Бели мугри“ од ученици од подмладок на Клубот на писатели „Коста Солев Рацин“, а потоа велешки поети читаа свои стихови посветени на Рацин. Програмата беше збогатена со документарен филм „Ленка“ односно „Менка“ по стиховите на Рациновата позната песна, а што го направија авторите Љупчо Данов и Весна Димитрова Бобевски.
Минатата недела во Самобор, Хрватска се одржа богата културно-уметничка програма со која се одбележа големиот јубилеј 80 години од печатењето на „Бели Мугри“ на Кочо Рацин.
