Бројот на загинати во вчерашниот страотен земјотрес во Албанија се искачи на 24, повредени се 650 граѓани, а 45 се спасени, јавуваат албанските медиуми.
Силните потреси, од кој насилниот беше со јачина од 6,4 степени според Рихтер, урнаа голем број станбени згради и еден хотел во Драч каде се регистрирани и првите жртви, двајца браќа од Косово. Меѓу жртвите е и еден млад човек кој штотуку излегол од затвор, откако судот го прогласил за невин, како и еден полицаец на должност.
Друго лице е пронајдено мртво откако скокнало од балконот на станот панично бегајќи од потресот.
Спасувачите во меѓувреме успеале да спасат 17-годишен тинејџер, под урнатините на неговиот дом во Драч. Тој побарал помош преку својот мобилен телефон.
Во видео обраќање, премиерот Еди Рама рече дека спасени се околу 40 лица, и додаде дека институциите ќе сторат сé за да ги извлечат сите лица за кои се верува дека се се уште под урнатините. Рама повика на смиреност и рече дека е уверен дека Албанците ќе ја надминат и оваа природна непогода.
