Двајца пациенти, на возраст од 73 и 83 години, од Злетово и од Кочани, починале во понеделникот на Инфективното одделение во Клиничката болница во Штип.
Портпаролката на Клиничка болница-Штип, Марина Шуманска во дневниот извештај забележува дека на Инфективното се хоспитализирани 54, а на Кожното одделение шест пациенти. Во текот на вчерашниот ден се хоспитализирани нови осум пациенти, а на постојана кислородна поддршка се 43 пациенти. Притисок има и во дневната амбуланта, каде инфектолозите дневно имаат 86 прегледи на пациенти со коронавирусот.
Началничката на Инфективно одделение, Дијана Шишкова-Гајдарџиска за МИА изјави дека деновиве имаат сѐ поголем број на пациенти, кои им доаѓаат во тешка здравствена состојба. Карактеристично за овој бран е што имаат се помлади пациенти на кои им треба болнички третман.
„Во претходните бранови не беше карактеристично и на други варијанти, типови на коронавирусот. Но, овој период со делта сојот имаме многу повеќе млади пациенти“, рече Шишкова-Гајдарџиска.
Директорот на Клиничка болница Штип, Ален Ѓеорѓијев, вели дека со ставањето во функција на Инфективното одделение, засега модуларната болница е под клуч, но доколку имаат поголем притисок, тоа ќе значи и нејзино отворање, но и реорганизација и ангажирање на дополнително медицински кадар.
