Двајца морнари беа убиени во напад на борците на јеменското хутистичко движење врз трговски брод во Црвеното Море во средата, соопштија британските и американските официјални лица, што се први смртни случаи откако шиитската проиранската бунтовничка група во Јемен започна напади врз бродови кои се поврзани со Израел а подоцна и со САД и Велика Британија на една од најфреквентните поморски рути.
Хутистите ја преземаа одговорноста за нападот во кој е запален грчкиот брод „True Confidence“ кој пловел под знамето на Барбадос на околу 50 наутички милји од пристанишниот град Аден.
„Најмалку двајца невини морнари загинаа. Ова е за жалење, но (тоа е) неизбежна последица од непромисленото лансирање ракети од Хутите против меѓународниот брод. Тие мора да престанат. Испраќаме длабоко сочувство до семејствата на загинатите и ранетите“, напиша британската амбасада на X.
Висок американски функционер, исто така, за Reuters ја потврди смртта на двајцата морнари.
Хутите од ноември напаѓаат бродови во Црвеното Море кои и покрај нивното предупредување пловат кон Израел или се поврзани со израелски интереси, во знак на солидарност со Палестинците откако избувна војната во Појасот Газа.
Велика Британија и Соединетите држави веќе два месеца вршат одмазднички напади против Хутите, а последните смртни случаи би можеле да поттикнат уште пожестоки воени дејствија.
Грчката бродарска компанија сопственик на бродот објави дека тој бил погоден и запален на приближно 50 наутички милји југозападно од јеменското пристаниште Аден и дека плута на површината. Додава дека сѐ уште нема информации за состојбата на 20-те членови на екипажот и тројца чувари, меѓу кои има 15 Филипинци, четворица Виетнамци, двајца државјани на Шри Ланка, еден Индиец и еден Непалец.
