Американската амбасада во Босна и Херцеговина го оцени како навреда за жртвите поставувањето споменик на Мехмед Алагиќ, покојниот генерал на бошњачката армија на БиХ, обвинет за воени злосторства врз Хрватите во централна Босна.
„Тоа е навреда за жртвите и нивните семејства“, се вели во одговорот на американската амбасада во Сараево за ентитетската Радио-телевизија ХерцегБосна од Мостар.
Тие додаваат дека „граѓаните на оваа земја заслужуваат подобро отколку да почестат лице обвинето за воени злосторства со поставување на грандиозен споменик на планината Влашиќ“.
На таа планина во централна Босна, во неделата во присуство на хрватскиот член на Претседателството на БиХ, Жељко Комшиќ, беше откриен споменик на бошњачкиот генерал.
Алагиќ беше обвинет за воени злосторства против Хрватите од централна Босна додека беше командант на Третиот корпус на Армијата на БиХ во 1993 година. Хашкиот трибунал го обвини заедно со високите офицери на Армијата на БиХ, Енвер Хаџихасановиќ и Амир Кубура, кои беа законски осудени на три ипол и две години затвор. Самиот Алагиќ не ја доби пресудата, бидејќи почина од срцев удар во 2003 година.
Обвиненијата против него се однесуваат на еден од најтешките масакри извршени врз Хрватите во централна Босна во 1993 година. На 8-ми јуни 1993 година, во гратчето Бикошим крај Травник, силите на 7-та муслиманска планинска бригада, 306-тиа планинска бригада и странски борци од земјите на исламските муџахедини убија околу триесет хрватски цивили и војници на Хрватскиот совет за одбрана (ХВО) кои претходно се предале. Четворица беа ранети, а еден од нив подоцна сведочеше дека го преживеал пукањето.
Американската амбасада ги повика сите власти во БиХ да промовираат „взаемно почитување и средина каде секој граѓанин ќе се чувствува како дома“.
Во изјава за РТВ ХерцегБосна, од мисијата на Организацијата за безбедност и соработка во Европа (ОБСЕ) ги повикаа сите во Босна и Херцеговина да избегнуваат акции и реторика кои „ја поткопуваат меѓунационалната доверба и помирување“.
