Адеми: Се надевам дека СОНК ќе се откаже од најавата за штрајк

72

Министерот за образование и наука, Арбер Адеми порача дека МОН останува отворено за конструктивни преговори со синдикатот и смета дека покачувањата за една година кои ќе резултираат во септември со 10.8 проценти повисоки плати е нешто што се нема случено години наназад.

Лани ја покачивме платата за 5 проценти. Во септември уште 5 проценти. Ќе има ново покачување но не можам да кажам уште сега кога ќе се случи тоа бидејќи треба да ги почекаме проекциите за следната буџетска година. Остануваме отворени за дијалог. Искрено се надевам и посакувам СОНК како наши пријатели со кои добро соработуваме до сега, да се откажат од најавата за штрајк на втори септември, изјави Адеми.

Новиот закон за наставници според министерот, дополнително ќе ја подобри улогата на сите наставници кои ќе имаат можност за напредување.

Следна средба помеѓу МОН и СОНК се очекува оваа недела.

Самостојниот синдикат за образование, наука и култура – СОНК, под притисок на своето членство донесе одлука на 2 септември (првиот учебен ден) да стапи во предупредувачки штрајк. Одлуката доаѓа по долги преговори со Министерството за образование и наука и Владата, а синдикатот не го прифаќа зголемувањето на платите од 5 проценти и бара покачување од 25 отсто.

Доколку преземете содржина од оваа страница, во целост сте се согласиле со нејзините Услови за користење.