Аријан Адеми е клучен дел од македонската фудбалска репрезентација. Играчот за врска не беше на последните натпревари поради повреда, се појавија многу шпекулации околу неговата иднина, а во интервју за „Германијак“, откри дека неговата приказна со националниот тим не е готова.
„Одлучив да продолжам да играм за репрезентацијата. Сакам, можам и ќе го направам тоа. Зборував со селекторот, сака да бидам таму и таму ќе бидам. Тешко ми е да се простам затоа што таму е одлична група на луѓе, играме за својата земја, се пласиравме на последното ЕП, а сакаме тоа да го направиме уште еднаш, иако не сме во лесна група“, изјави Адеми.
Главни фаворити во групата за ЕП 2024 ќе бидат Англија и Италија, а потоа следат Украина, Македонија и Малта.
„Свесни сме дека нема да биде едноставно, но веќе ја победивме Германија, исто и Италија и немаме од кого да се плашиме. Знам дека Италијанците ќе бидат посебно мотивирани против нас затоа што ги исфрливме од Мундијалот, но и ние ќе бидеме мотивирани и веруваме дека можеме да оствариме уште една голема победа“, кажа Адеми во интервјуто за „Германијак“.
Квалификациите за ЕП 2024 стартуваат во месец март.
Доколку преземете содржина од оваа страница, во целост сте се согласиле со нејзините Услови за користење.
