Администрацијата на претседателот Џо Бајден од Демократската партија, во вторникот две седмици пред истекувањето на нејзиниот мандат, воведе санкции против шефот на кабинетот на унгарскиот премиер Виктор Орбан поради неговата наводна „вмешаност во корупција“ во земјата, се вели во соопштението на американското Министерство за финансии.
Антал Роган, кој е задолжен за контрола на разузнавачките агенции и за медиумите, е обвинет за „оркестрирање системи на корупција за контрола на стратешките сектори на унгарската економија и пренасочување на приходите во своја полза и во полза на лојалните поддржувачи на неговата политичка партија“.
Ниту Роган, ниту портпаролот на унгарската влада не одговорија на барањето на Reuters за коментар.
Орбан беше еден од најгласните поддржувачи на новоизбраниот републикански претседател Доналд Трамп во Европа и се сретна со него во текот на предизборната кампања. Трамп ќе биде инаугуриран за претседател на САД на 20 јануари.
„САД нема да се двоумат да бараат одговорни поединци, како Роган, кои ја користат моќта на нивната канцеларија за незаконски да се збогатат себеси и своите пријатели на сметка на нивната земја и нивните сограѓани“, рече високиот претставник на одделот Бредли Т. Смит во писмена изјава.
Роган со децении е близок соработник на Виктор Орбан, водејќи ја неговата медиумска машина, како и изборните кампањи.
Односите меѓу суверенистичката влада на Унгарија и САД станаа сè позатегнати за време на претседателствувањето на Џо Бајден, која е обвинувана за блиски врски на Будимпешта со Москва и покрај војната во Украина.
