Џафери: На Украина ќе ѝ дадеме секаква помош, а ако треба, и воена

Претседателот на Собранието, Талат Џафери, по враќањето од посетата на Киев и средбата со украинскиот претседател Володимир Зеленски, денеска во законодавниот дом рече дека Украина ќе добие различен вид на помош од Македонија, зависно од потребите кои подоцна ќе бидат определени, а ако треба и воена.

– Како општа определба на државата е да се поддржува Украина и украинскиот народ. Така и јас отидов да дадам лична поддршка за земјата да ја врати контролата на целата територија. Таа поддршка е повеќезначајна, може и во финансиски, материјален и санитарен аспект, во зависност што ќе побара Украина. Секако може да биде и воена, изјави тој.

Според него, обврските ќе произлезат од потребите што ќе се искажат и Собранието треба да ги дефинира злоделата што се направени за да се иницира резолуција.

За своето патување во Киев спикерот рече дека ги известил премиерот и претседателот, а ги истакна и своите впечатоци.

– Зоната во која што се движевме беше надвор од воени дејствија и намерата беше да се видат на самото место последиците. Позитивен момент беше што луѓето се свесни што им се случува и работоспособните си одеа на работа, земјата е обработена и впечатокот е дека моралот и на ѓраѓаните и на институциите е на високо ниво, наведе Џафери.

Доколку преземете содржина од оваа страница, во целост сте се согласиле со нејзините Услови за користење.