АХВ уверува дека цената на свинското месо нема да поскапи поради новиот случај на африканска свинска чума

Уништувањето на 9 илјади свињи од фарма на истокот во која е откриена африканска чума, нема да ја зголеми цената на свинското месо. Од Агенцијата за храна и ветеринарство, велат, иако се работи за неколку илјади грла, нивното уништување, нема да влијае на пазарот. Можен бил мал недостиг, но тој, како што појаснуваат бил еднаков на вишокот месо кое завршувало во преработувачката индустрија.

„Се е под контрола, значи не треба да се прави од ова било какво политиканство и точно, негде од производството на домашно свежо месо, бидејќи нашата држава е увозно независна ќе се осети мал, можеби мал недостаток. Затоа, нема потреба од манипулирање со цени и зголемување на цените на свинското месо, бидејќи, нашите производители на свинско месо ги задоволуваат потребите и остануваше одреден вишок кој одеше во преработувачката индустрија. Е сега, тој вишок ќе го изгубиме“, изјави Николче Бабовски, Директор на АХВ.

Од Агенцијата велат внимателно била избрана локацијата каде треба да се закопаат свињите заразени со африканска чума, за како што појаснуваат, да се спречи ширење на болеста. Бабовски ги отфрла сомнежите за можна неточност на испитувањата правени од Ветеринарниот факултет, бидејќи како што вели, болеста е потврдена и на примероците испратени во лабораторија во Шпанија.

Доколку преземете содржина од оваа страница, во целост сте се согласиле со нејзините Услови за користење.