Албанија: Утре четврт круг на гласање за нов претседател

Во албанскиот Парламент утре ќе биде спроведен четвртиот круг на гласање за нов претседател на државата, јави дописничката на МИА од Тирана. Пленарната седница е закажана за 18 часот.

Претходните три пропаднаа поради немање кандидатура, бидејќи владејачките социјалисти и парламентарната опозиција не постигнаа консензус.

Уставот предвидува пет круга за гласање. Во првите три потребна е поддршка од 84 од вкупно 140 пратеници, што социјалистите ги немаат, додека во следните два 71 поради што не им е проблем да изберат свој кандидат.

Попладнево, претседателството на партијата ќе одржи седница на која ќе се расправа за конкретни имиња.
Најчесто споменувани имиња за наследник на актуелниот Илир Мета се поранешниот премиер и лидер на ПС, Фатос Нано и демократката Мајлинда Брегу, актуелен генерален секретар на Советот за регионална соработка.

Мандатот на актуелниот, седми претседател, по падот на комунизмот, Илир Мета завршува на 24 јули.

Доколку преземете содржина од оваа страница, во целост сте се согласиле со нејзините Услови за користење.