Пратеникот на унгарската владејачката партија Фидес во Европскиот Парламент, Андор Дели, пред своите европски колеги порача дека на кревката безбедност на Западен Балкан и се потребни силни сигнали од ЕУ, кои ќе ги уверат земјите од овој регион дека со право имаат место во иднината на Унијата, пренесе Танјуг.
– Сите знаат дека постојат некои итни прашања: Брегзит, миграцијата, изборите во некои држави членки, но ние мораме сериозно да ги сфатиме и очекувањата на нашите партнери од Западен Балкан, инаку можеме да ги загубиме, истакна Дели во вчерашниот говор во текот на првиот ден од пленарната седница, соопшти денеска неговиот кабинет.
Во говорот во Стразбур Дели потсети дека пратениците на ЕП на претходното пленарно заседание од претседателот на Европската комисија Жан-Клод Јункер слушнале за пет сценарија за иднината на Европа, но забележа дека на овие планови им недостасува ставот на Комисијата за проширувањето на ЕУ.
– Знаеме дека 27 лидери на 27 држави членки ќе ја одбележат 60-годишнината од потпишувањето на европската основачка спогодба. Но, која порака од Рим ќе биде упатена кон земјите кандидати?, запраша унгарскиот европратеник.
Тој нагласи дека „на кревката стабилност на Западен Балкан и се потребни силни сигнали од ЕУ, кои ќе ги уверат Србија, Македонија, Албанија, Црна Гора и Босна и Херцеговина во нивното полноправно место во иднината на ЕУ“.
Дели, исто така, предупреди дека миграцијата и натаму е многу присутна и дека вкупната безбедност на Европа едноставно не може да поднесе дополнителна нестабилност во своето соседство, се наведува во соопштението.