Билансите на банкарскиот систем упатуваат на здрави фундаменти. Во 2008 година, кога глобалната економија се соочи со криза, адекватноста на капиталот на нашите банки беше пониска отколку сега – тогаш изнесуваше околу 16 отсто, а сега е 17 проценти, што претставува простор за справување со евентуални шокови, истакна гувернерката на Народната банка, Анита Ангеловска-Бежоска, во синоќешното издание на емисијата „Економски магазин“ на телевизијата Алсат-М, во коешто акцентот беше ставен на можните ефекти од ширењето на вирусот ковид-19 врз економијата.
Како што оцени челничката на македонската централна банка, ликвидноста, исто така, сега е повисока отколку во преткризниот период во 2008 година, а многу е важно што и профитабилноста на банкарскиот систем е на солидно ниво, бидејќи ако има потреба за докапитализација заради поддршка на кредитната активност, банките имаат интерен потенцијал да ја обезбедат.
Ангеловска-Бежоска посочи и дека, сега, квалитетот на активата на банкарскиот систем е многу подобар отколку во периодот пред последната глобална економска криза, што јасно се согледува преку пониското учество на нефункционалните во вкупните кредити. Како што кажа таа, тоа се движи околу 4,8 отсто со што на регионално ниво, во споредба со другите економии, е и едно од најниските учества на нефункционалните во вкупните кредити.
Сево ова, како што кажа гувернерката, претставува илустративен показател дека банкарскиот систем на нашата земја е отпорен на потенцијалните шокови, меѓу коишто се и можните ефекти врз економијата од ширењето на вирусот ковид-19 на глобално ниво.
Ангеловска-Бежоска подетално се осврна и на можните ефекти на ширењето на вирусот врз глобалната економија, пред сѐ заради значењето коешто го има кинеската економија за глобалните економски движења.
Во емисијата гостуваа и министерката за финансии, Нина Ангеловска и Ангелка Пеева-Лауренчиќ како претставник од бизнис-секторот.
