Анкара бара објаснувања од Киев откако голем број турски банки и бизнисмени беа додадени на веб-страница поврзана со украинската влада која повикува да се санкционираат оние кои ја поддржуваат Русија, објави весникот Ајдинлик.
Турција изминатиот викенд му се обрати на украинскиот амбасадор во Анкара во врска со ситуацијата, изјавија дипломатски извори за весникот во вторникот.
Турската мисија во Киев исто така побара објаснување од украинските власти, додаваат тие.
„Со оглед на нашето постојно стратешко партнерство, солидарност и соработка со Украина, се очекува турските поединци и организации да не бидат цел на санкции“, велат изворите.
Ајдинлик претходно објави дека на веб-страницата „Војна и санкции“ се појавиле податоци за турските компании, вклучително и државната банка Зираат, големата приватна банка Денизбанк и пиварот Анадолу Ефес, како и голем број бизнисмени од земјата, кои соработуваат со Русија.
Онлајн платформата, која е поддржана од украинското Министерство за надворешни работи и Националната агенција за спречување на корупцијата, ги наведува оние кои, според Киев, треба да бидат санкционирани „за нивната поддршка на руската војна против Украина“.
Анкара ја осуди воената операција на Москва во Украина, но се воздржа од приклучување кон меѓународните санкции против Русија и покрај притисокот од САД и нивните сојузници. Турскиот претседател Реџеп Таип Ердоган имаше средби и со рускиот лидер Владимир Путин и со неговиот украински колега Владимир Зеленски од избувнувањето на конфликтот кон крајот на февруари.
Поранешниот турски дипломат Улуч Озулкер рече дека е „луда“ работа Киев да бара ограничувања за турските бизниси и претприемачи.
„Турција е единствената земја што може да преговара и со Украина и со Русија. Украина го продава своето жито со посредство на Турција и заработува пари. На Украина и треба Турција“, додаде Озулкер.
