Јапонија го потврди првиот смртен случај од коронавирусот

36

Првиот смртен случај како последица на зараза со новиот сој коронавирус е потврден на територијата на Јапонија, изјави во четвртокот министерот за здравство, труд и социјална заштита Кацинобу Като.

Министерот истакна дека починала 80-годишна жена од округот Канагава, кој граничи со главниот град Токио. Като ја соопшти информацијата на прес-конференција, без да изнесе повеќе поединости.

Во Јапонија повеќе од 200 луѓе се заразени од коронавирусот кој предизвикува опасна форма на пневмонија. Станува главно збор за патници и членови на екипажот на туристичкиот крстосувач „Diamond Princess“, а на кој во четвртокот беше потврден и првиот случај на зараза на македонски државјанин кој е член на екипажот на бродот.

Истовремено јапонските здравствени власти соопштија дека инфекцијата со вирусот во четвртокот е потврдена и кај таксист во Токио, како и кај лекар во префектурата Вакајама. Како што пренесува агенцијата Kyodo, во болницата во кој работел заболениот стопиран е приемот на нови пациенти.

Меѓу заболените Јапонци, 12 се лица кои биле евакуирани со чартер летови од кинескиот град Вухан, од каде започна ширењето на инфрекцијата.

Доколку преземете содржина од оваа страница, во целост сте се согласиле со нејзините Услови за користење.