Арсовски: Владата пред избори дополнително ќе ја задолжи земјата за 130 милиони евра

Премиерот Зоран Заев и неговиот министер за финасии Драган Тевдовски на само месец и половина пред претседателските избори ќе ја задолжат Република Македонија за нови 130 милиони евра, предупреди во вторникот на прес-конференција портпаролот на ВМРО-ДПМНЕ, Димче Арсовски.

Дали власта се задолжува над 130 милиони евра со цел изборна корупција. Каде ќе завршат милионите на граѓаните на Република Македонија кои треба да ги враќаат истите со камата? Дали истите се наменети за изборен поткуп исто како сите оние вработувања кои што во моментов се реализираат?, праша портпаролот на опозициската партија.

Арсовски констатираше дека спиралата на задолжување веќе не може да запре, а СДСМ ја води државата кон инсолвентност со тоа што само за две години колку што се на власт го зголемија јавниот долг за над половина милијарда евра со што истиот надмина 5 милијарди евра и е повеќе од 50 отсто од бруто домашниот производ (БДП).

СДСМ се задолжува, а граѓаните воопшто не знаат за што одат и се трошат парите. Две години власта нема ставено камен на камен, или изградено барем една педа автопат. Еден проект не е направен, една улица не е асфалтирана, граѓаните газат во кал. Никој не знае каде одат милијардите, кои утре сите граѓани на Република Македонија ќе ги враќаат со високи камати. Пред да дојдат на власт СДСМ ветуваа дека ќе го намали задолжувањето, сега откако се власт, не само што не го намалија туку и енормно го зголемија, истакна портпаролот на ВМРО-ДПМНЕ.

Арсовски потенцираше и дека со ваквото темпо на задолжување, државата се движи кон границата на инсолвентност, што за многу кратко време ќе предизвика државата да има проблем со отплаќање на долговите.

Задолжувањето како инструмент за финансирање е дозволиво единствено само доколку со него се извршуваат капитални инвестиции. Во моментов знаеме дека нивото на капиталните инвестиции е многу ниско. СДСМ во изминативе две години не направи ниту еден инфраструктурен проект. Нивото на реализација на капитални инвестиции минатата година изнесуваше очајни 65 отсто, од она што го предвиде владата, што е најниско ниво досега забележано, истата пракса продолжува и оваа година, имено во јануари нивото на реализација на капитални инвестиции изнесува само 1%, што е доволен показател дека и оваа година, исто како и минатата нема да има ниту еден капитален проект, рече Арсовски:

Со ова, оцени Арсовски, СДСМ покажува дека не умее да ја води државата.

Со СДСМ, Република Македонија само тоне во долговите. Претседателските избори се првата можност граѓаните да му кажат едно огромно НЕ на СДСМ, што ќе биде повод за предвремени парламентарни избори, со цел промена на оваа расипничка власт, заклучи Арсовски.

 

Доколку преземете содржина од оваа страница, во целост сте се согласиле со нејзините Услови за користење.