Австралија сака „Гугл“ и „Фејсбук“ да им плаќаат на медиумите за објава на вести

13

Австралиската влада планира да им даде рок од три месеци на „Гугл“ и „Фејсбук“ за да испреговараат праведна исплата со медиумите во оваа земја за објавување на вестите. Австралија е првата земја во светот која се обидува да ги принуди технолошките гиганти да плаќаат за објавување на медиумските содржини, што би претставувало чекор во насока на заштита на независното новинарство и поддршка за пребродување на корона кризата во медиумскиот сектор, пишува „Гардијан“.

Лондонски „Телеграф“ го пренесува австралискиот министер за финансии Џош Фрајденберг, којшто изјави дека ова е фер за австралискиот медиумски бизнис, бидејќи ќе обезбеди одржливо медиумско опкружување преку зголемена заштита на користењето на содржините и поголема конкуренција. Моделот на австралиската влада е сличен на заштитата на авторското право, а истиот би бил регулиран со закон, изјави министерот за финансии.

„Гардијан“ пишува дека „Гугл“, „Фејсбук“ и другите дигитални платформи би биле принудени да платат казни од стотици милиони долари доколку не успеат да се договорат во согласност со кодот на австралиската Комисија за конкуренција и потрошувачи, која што го изработи овој задолжителен документ во април откако претходно „Гугл“ и „Фејсбук“ не успеаја да се договорат со медиумите во врска со користењето на нивните содржини.

Како последина на пандемијата на ковид-19, во Австралија досега се затворени десетици дневни весници, додека останатите комерцијални медиумски куќи регистрираат остар пад на приходите од реклами.

Доколку преземете содржина од оваа страница, во целост сте се согласиле со нејзините Услови за користење.