Американскиот претседател Џо Бајден во вторникот во Обединетите нации го бранеше хаотичното повлекување на САД од Авганистан, тврдејќи дека е неопходно да се префрли фокусот на американската политика од антидемократските системи и да се фокусира на глобалните предизвици; пандемијата со коронавирусот и климатските промени.
„Завршивме дваесетгодишен конфликт во Авганистан и ера на немилосрдна војна, отвораме нова ера на немилосрдна дипломатија“, рече Бајден обраќајќи се пред Генералното собрание на ОН првпат како американски претседател.
Соочен со критики за повлекување од Авганистан, Бајден вети дека ќе ги брани националните интереси на САД, но рече дека „мисијата мора да биде јасна и остварлива“ и дека американската војска „не смее да се користи како одговор на секој проблем што го гледаме во светот“.
Бајден се надева дека ќе обезбеди убедливи докази дека САД остануваат доверлив сојузник на своите партнери ширум светот по долгогодишната политика „Америка на прво место“ предводена од неговиот претходник од Републиканската партија, Доналд Трамп.
Бајден рече дека светот се соочува со решавачка деценија и дека справувањето со различните предизвици „ќе зависи од нашата способност да признаеме дека сме дел од заедничкото човештво“.
Додаде дека „наместо да продолжиме да се бориме во војните од минатото, да ги разгледаме“ предизвиците како што се глобалната пандемија, справување со климатските промени, кибер заканите и управување со промените во „глобалната динамика на моќ“.
