Фудбалерите на Барселона се победници во шпанскиот Куп на кралот, откако во саботата во финалниот дуел одигран на стадионот „Ванда Метрополитано“ во Мадрид ја совладаа Севилја со 5:0.
Речиси целиот напад на Каталонците се запиша во листата на стрелците за четвртата титула со ред во шпанскиот куп. Луис Суарез беше прецизен во 14 и 40 минута, Лионел Меси во 31 минута, Андреас Иниеста кој беше прогласен за играч на мечот постигна гол во 52 минута, а Фелипе Кутињо во 69 минута.
Севилја којашто во на патот до финалето го елиминираше Атлетико Мадрид, потполно потфрли на неговиот стадион. При водство од 1:0 на Барса, Жоакин Кореа пропушти добра можност кога шутираше од десетина метри, додека Сандро Рамирез од изгледна позиција гаѓаше директно во голманот Јаспер Силесен.
За Барселона ова е рекордниот 30-ти триумф во Купот, додека Севилја остана на пет трофеи, а последниот го освои пред пет години.
