Американскиот државен секретар Антони Блинкен во понеделникот во Анкара изјави дека влезот на Шведска и Финска во НАТО, кој е блокиран од Турција, не е билатерално прашање и дека Вашингтон силно ги поддржува двете земји.
Блинкен рече дека Вашингтон силно го поддржува забрзаниот пристап на Шведска и Финска во НАТО со оглед на чекорите што тие веќе ги презеле, дури и откако неговиот турски колега ја нагласи потребата од дополнителни конкретни чекори.
„САД силно го поддржуваат нордискиот пристап што е можно побрзо… Шведското и финското проширување на НАТО не е билатерално прашање“, рече Блинкен на заедничката прес-конференција со турскиот министер за надворешни работи Мевлут Чавушоглу во Анкара.
Чавушоглу, покрај Блинкен, рече дека сите страни во Алијансата мора да ја убедат Шведска да стори повеќе за да се отстрани загриженоста на Анкара и да се добие нејзината поддршка.
Шведска и Финска, по децениите тесна воена соработка со НАТО и покрај декларираната воена неутралност, минатата година под изговор за зголемен ризик по почетокот на руската инвазија на Украина, дефинитивно побараа прием во членство во Алијансата.
Чавушоглу рече дека Турција очекува поддршка од американскиот Конгрес за да го постигне планираниот договор од 20 милијарди долари за продажба на американски борбени авиони „F-16“. Додаде дека разговарал за ова прашање со Блинкен и дека Турција би сакала американската администрација да испрати официјално известување до Конгресот во врска со авионите.
Блинкен истакна дека Вашингтон ќе продолжи да ја поддржува Турција „колку што е потребно“ по земјотресот што ја погоди земјата пред две седмици, но Чавошоглу рече дека нема потреба да се чека катастрофа или тешки времиња за да се поправат односите со САД.
Чавушоглу посочи дека не е можно Турција да купува американски авиони со поставвуање предуслови и оти верува дека проблемот може да се надмине доколку администрацијата на Бајден остане одлучна.
Блинкен, пак, ја откри главната цел на неговата посета на Анкара и додаде дека „јасната турска поддршка за украинскиот суверенитет е клучна“.
„САД и Турција не се согласуваат за секое прашање, но тоа е партнерство кое издржа предизвици“, рече Блинкен.
Турскиот министер за надворешни работи истакна дека Турција не продава производи што може да ги користи Русија во нејзината инвазија на Украина, откако САД претходно во февруари предупредија за извоз на хемикалии, микрочипови и други производи. Чавушоглу рече дека Турција нема да дозволи прекршување на американските или европските санкции во Турција или преку Турција и дека Анкара презема чекори за да го спречи тоа.
