Шефот на дипломатијата на ЕУ, Жосеп Борел, оцени дека во 2021 година растот на ескалациите и реториката на поделби на Западен Балкан ги попречило земјите од регионот во нивниот пристап кон европската иднина.
Како посебен пример за таква ситуација, Борел ја навел ситуацијата во БиХ.
Во својот новогодишен блог за најважните настани во 2021 година на полето на надворешната и одбранбената политика на ЕУ, Борел ја оценил годината зад нас како „година на транзиција“ во која ЕУ работела на зачувување на своите интереси и вредности и зајакнување глобалниот поредок.
„Таа работа мора да продолжи и во 2022 година“, вели Борел.
Зборувајќи за непосредното соседство на ЕУ, Борел првенствено се фокусирал на Украина, Молдавија и Белорусија, каде Унијата, како што рече, се соочи со „јасни примери на политика на моќ“ и хибридни напади.
„Како што се шират хибридните напади, ние мора да продолжиме да ги поддржуваме Украина и Молдавија во отпорот на Русија и да одржиме немилосрден пристап кон Белорусија“, напиша Борел.
Борел нагласил дека во 2021 година односите меѓу ЕУ и САД биле рестартирани во времето на претседателот Џо Бајден и се одразиле на блиската соработка во борбата против климатските промени, иранските нуклеарни преговори, оданочувањето на компаниите, но и во односите со Кина и Индо-Пацификот.
Шефот на дипломатијата на ЕУ оценува дека Унијата, кога е Кина во прашање, задржала единствена позиција во признавањето на таа земја како „партнер, конкурент и ривал“.
Тој додава дека во 2021 година ЕУ го зголемила својот ангажман со Латинска Америка, усвоила нова стратегија кон Индо-Пацификот и почнала да работи на зајакнување на нејзиниот ангажман со африканските земји.
Борел позитивно го оцени стабилизирањето на ситуацијата во Либија и во источниот Медитеран во текот на 2021 година.
Во својот новогодишен блог, шефот на дипломатијата на ЕУ наведува дека пандемијата трае „подолго од очекуваното“ и додава дека ЕУ обезбедила доволно дози за целосна вакцинација и засилени дози за своите граѓани.
Борел потсети дека мнозинството Европејци примиле две дози од вакцината против Ковид-19 и повика да се работи повеќе на униформноста на вакцинацијата ширум светот.
„Од вкупно две милијарди дози вакцини, ЕУ извезе над 1,1 милијарди дози во 61 земја, а европскиот тим дистрибуира повеќе од 385 милиони дози. Европскиот тим има намера да донира вкупно 700 милиони дози до средината -2022 година“, објави Борел.
Покрај пандемијата, Борел изјави дека ЕУ се соочувал со други „кризни ситуации“ на меѓународната агенда во 2021 година, како што се „Белорусија, Украина, Мали, Судан, Авганистан, Етиопија и Венецуела“.
„Да се биде во постојан режим на управување со кризи понекогаш го ослабнуваше нашиот капацитет да се справиме со трансверзални и долгорочни прашања“, рече Борел.
Сепак, Борел заклучил дека и покрај многуте пречки во 2021 година, имало „позитивни случувања“, како што е презентацијата на Стратешкиот компас на ЕУ, чија цел е да ја зајакне безбедносната улога на ЕУ во светот.
