Шефот на европската дипломатија, Жозеп Борел денеска изјави дека заедно со своите партнери од ОБСЕ, на собирот во полскиот град Лоѓ, ќе ги разгледуваат „сите правни опции“ да се принуди Русија да плати за уништувањето во Украина.
Тој појасни дека се запленети речиси 20 милијарди евра од олигарси и поединци кои ја поддржуваат Русија и се контролираат околу 300 милијарди финансиски средства на Руската централна банка.
„Тие пари треба да се искористат за обнова на Украина“, инсистираше тој на министерскиот состанок на ОБСЕ во Лоѓ, организацијата составена од 57 држави меѓу кои и Русија и Украина.
Полска, која е ротирачки претседавач со ОБСЕ, одби да му дозволи влез на рускиот министер за надворешни работи Сергеј Лавров, одлука која Москва ја нарече провокативна. Русија во Лоѓ ја претставува нејзиниот амбасадор во ОБСЕ.
