Царовска: Зголемена социјална помош, помалку сиромаштија

Се грижиме за сите граѓани на Македонија и продолжуваме да градиме фер општество во кое секој е важен. Во собраниска процедура се пакет закони со кои граѓаните ќе ги извлекуваме од сиромаштија и очекувам пратениците наскоро да ги изгласаат, порача министерката за труд и социјална политика Мила Царовска пред многубројните граѓани, кои покажаа интерес да учествуваат на трибината „Фер општество – шанса за сите“, која се одржува денеска во Мултимедијалниот центар „Киро Глигоров“ во Општина Штип.

Ова го соопштија од Секторот за односи со јавноста на Владата на Република Македонија.

 – За Штип има добра вест, во 2019 ќе заврши изградбата на нова градинка со капацитет од 200 деца, со што ќе се затвори проблемот со недостиг на места за згрижување на деца – порачала Царовска на трибината, додавајќи дека во наредниот период и инвестициски и капацитетно ќе се градат градинките.

Оттаму додаваат дека „таа потенцирала дека детската сиромаштија е прескапа за земја како нашата и затоа детски и образовен додаток ќе земаат сите деца кои имаат потреба од тоа, за да создадат услови сите деца да имаат редовно образование и да бидат еднакви. Место сегашните 3.200, детски додаток со реформата ќе земаат 73.500 деца, а образовниот го прошируваме за над 64.000 деца место сегашните 3.800“.

Царовска нагласила дека кога зборуваме за праведно општество, треба целосно да ја вратиме и социјалната правда во нашата земја.

– Трансферираме пари во социјалните семејствата но и ќе работиме истите да се вратат на пазарот на труд. Новиот концепт е висок минимален гарантиран приход но и брза активација на пазарот на труд на лицата од социјален ризик – додала Царовска.

Таа кажала оти „во Штип кој е текстилен град, работниците земаа плата која е под нивото на минималната плата. Ние ја зголемивме минималната плата која сега изнесува 12,126 денари со тоа ја отворивме спиралата на раст на плати и просечната плата порасна за 5,6 проценти”.

Царовска додала дека е исполнето и долгогодишното барање на рударите да одат во пензија со бенефициран стаж.

– Рударите ќе одат во пензија со 40 години стаж за мажи и 35 години стаж за жени. Досега, благодарение на овие законски измени околу 50 рудари ќе заминат во пензија порано, користејќи го бенефицираниот стаж, со што и се обновува работната сила во рударството – се вели во соопштението.

Осврнувајќи се на Гаранцијата за млади, Царовска појаснила:

– За да можеме да ја намалиме невработеноста на младите на возраст од 19 до 25 години во Оперативниот план и минатата година и годинава се спроведува младинската гаранција, што не прави единствена држава што не е во ЕУ, а ја имплементира. Се враќа довербата помеѓу Агенцијата за вработување и младите луѓе – изјавила Царовска во своето обраќање додавајќи дека очекува вклучување и од бизнис заедницата.

Трибината, каде учествувала и министерката за правда Рената Дескоска, била „интерактивна дебата со граѓаните и заинтересираните субјекти за реализацијата на политиките на праведна социјална реформа, која обезбедува фер општество, еднакво за сите“.

Доколку преземете содржина од оваа страница, во целост сте се согласиле со нејзините Услови за користење.