Цените на нафтата се намалија на 40 долари на меѓународните пазари во четвртокот под притисок на зголемувањето на залихите во САД и зголемување на заразени со коронавирус.
Цената на барел сурова нафта на лондонскиот пазар беше 11 центи пониска во однос на претходното затворање и изнесуваше 40,20 долари. Вчера се затвори трговијата со минус 2,32 американски долари.
На американскиот пазар, денес барелот се тргуваше по цена од 25 центи пониска, од 37,76 долари. Вчера, пазарот се затвори со минус од 2,36 долари.
Пазарите беа потресени од вчерашниот извештај на владата на САД, кој покажа дека залихите на сурова нафта пораснале за 1,4 милиони барели минатата недела. Некои утеха најдоа во податоците за падот на резервите на бензин, што се толкуваше како индикација за зајакнување на побарувачката.
Трговците сè уште беа преокупирани со извештајот денес, што се одрази на континуираниот пад на цените.
„Извештајот беше последен клинец во ковчегот за оние кои шпекулираат за зголемувањето на цените, иако податоците не се толку депресивни како што сугерираат цените. Добрата страна на приказната е дека потрошувачката на нафта е здрава“, рече Тамас Варга, брокер од PVM.
Пазарите исто така се мачат со нови случаи на заразени со коронавирус во некои американски држави. Австралија забележа најголем скок по бројот на случаи на ден во последните два месеци.
„Побарувачката се очекуваше да порасне како што стивнуваше заразата со КОВИД 19 и сега повторно се заканува од се повеќе нови случаи на клучните пазари. Сега сите чекаат одговор на владата за новиот бран на пандемијата“, рече Бјорнар Тонхауген од „Rystad Energy“.
Ако владите повторно ги воведат мерките за сузбивање на вирусот, тоа ќе ја забави економијата и со тоа и побарувачката за нафта, стравуваат трговците. Негативните економски последици од пандемијата јасно се гледаат во најновата проценка на Меѓународниот монетарен фонд дека светската економија ќе падне за 4,9 проценти оваа година. Во април, ММФ предвиде пад од 3 проценти. Значителниот пад на цените е попречен од намалената испорака на водечките производители, според договорот постигнат во средината на април.
Организацијата на земјите извознички на нафта (ОПЕК) и нејзините сојузници се согласија да ги намалат испораките за 9,7 милиони барели на ден во мај, јуни и јули, при што инвеститорите се обидуваат да утврдат дали се подготвени да го продолжат договорот до крајот на годината. Одделно, ОПЕК утрово објави на својата веб-страница дека цената на барел нафта на референтната кошница на нејзините членки во средата е 38,17 долари, што значи дека падна за 1,68 долари од претходниот ден на тргување.
