Добро е што нашите пилоти не се толку нервозни, колку вашите во однос на Русите, изјави грчкиот премиер Алексис Ципрас пред турскиот премиер Ахмет Давутоглу за време на самитот ЕУ-Турција, пренесува МИА.
Ципрас ова го посочи во своето обраќање кон турскиот премиер на социјалните мрежи по прашањето за бегалскиот прилив и нарушувањето на грчкиот воздушен простор од страна на турски авиони.
Вистинска војна се водеше доцна синоќа на Твитер помеѓу двајцата премиери, пред Ципрас да ги избрише твитовите од англиската верзија на профилот.
Апсурдно е тоа што се случува во Егејското Море. Трошиме милијарди за вооружување, за вие да вршите нарушувања, а ние да ги пресретнуваме авионите, додаде тој.
Поседуваме најмодерни воздушни оружја, а на копно не можеме да ги откриеме трговците со луѓе, поради кои невини човечки животи згаснуваат во Егејското Море, рече грчкиот премиер.