Во врска со сообраќајната несреќа која се случи во неделата на автопатот Велес – Скопје, кај Кула, во која се преврте туристички автобус со македонски патници кои летувале во Грција, а во кој имаше повредени 27 патници и еден починат, во Основното јавно обвинителство во Велес, како што изјавија за МИА, поради здравствената состојба на возачот кој е во болница, ќе чекаат негово опоравување и од наредната недела ќе го сослушаат во врска со несреќата.
Како што изјави Славица Темелковски, основен јавен обвинител при ОЈО Велес, освен возачот, ќе ги сослуша и сите патници кои биле во автобусот кои се повредени или не се повредени.
„Чекаме да се соземат од немилиот настан и најверојатно од понеделник сите ќе ги сослушаме, по што ќе се изврши вештачење и анализи во врска со настанот. Откако сето тоа ќе се заврши ќе можеме да лоцираме кај кого е кривичната одговорност“, изјави Темелковски.
