Д-р Пановски за големата смртност од ковид-19 во Македонија и за тоа дека секоја болница лекува со сопствен протокол

Прочуениот македонски микробиолог д-р Никола Пановски смета дека надлежните институции направиле поголем број на нелогичности во справувањето со пандемијата предизвикана од коронавирусот.

-Кога има пандемија државата ја води државата, а не граѓаните. Наместо овие тестови со кои се тестираат здрави деца по училиштата да се испратат кај настинати деца ќе беше многу попаметно. Приватните лаборатории во меѓувреме се збогатија. Јас знам колку чинат тестовите и знам дека може да се работи со интерес со многу пониска цена. Ако ги симнеа цените во јуни лани, ЕК ќе ни ги дадеше тие пари. Вака, ни рекоа сте штеделе и еве ви помалку пари. Значи, нема финансиско оправдување за тоа. Излегува тој што има пари ќе се тестира и ќе го купи лекот, оти нема поента тестирање да ви закажат по седум дена, а лекот се пие во првите пет – вели д-р Пановски за „Утрински брифинг“.

Тој открива и дека протоколот за лекување на пациенти заболени од ковид-19 не е единствен во сите клиники.

-Има протокол за лекување, но никој не го објавува. Мене ми го прати протоколот д-р Докиќ лани во ноември. Сега секоја болница има свој протокол. Д-р Докиќ вели дека смртноста во нивниот ковид центар е 25%, тогаш смртноста кај другите кој знае колкава е за да се дојде до 50%. Матичните лекари треба да престанат да даваат антибиотици со причина да не се спуштело на бели дробови. Мора да има образложение за примена на лек, а лекови на своја рака треба да се платат приватно и одговорноста е кај пациентот – предупредува д-р Пановски.

Д-р Пановски за одговорна ја смета и лекарската комора, но и праксата на матичните лекари.

-Лекарската комора молчи, има сѐ уште инфектолози кои препишуваат антибиотик веднаш штом ќе дојде пациент. Исто е и со вакцинирање на прележани. Се даваат двојни токсични дози антибиотик. На 40.000 пациенти им дале 70.000 дози, а имало само 20.000 случаи. Ако за сето ова молчат стручните здруженија не ни се пишува добро – кометира д-р Пановски.

Доколку преземете содржина од оваа страница, во целост сте се согласиле со нејзините Услови за користење.