Ќе започне изградбата на патеки за слепи лица од седиштето на Сојузот за слепи до централното градско подрачје, односно до плоштадот Македонија, најави неодамна министерот за труд и социјална политика, Диме Спасов.
Тој додаде дека ќе биде и иницирана законска измена со која што ќе се создаде и обврска за општините во централните градски подрачја и градските паркови, а се со цел продолжување на континуираната поддршка на оваа категорија граѓани и исполнување на нивните потреби.
Патеките за слепи лица се дел од програмата на ВМРО-ДПМНЕ каде стои дека согласно реалната потреба на слепите лица, ќе се изградат гумирани помошни патеки кои значително ќе им го олеснат движењето по фреквентните места во Скопје, а и во другите градови низ Македонија во зависност од тоа каде ќе има простор и потреба. Со овој проект на слепите лица ќе им се овозможи полесно завршување на своите обврски, посоодветен пристап до јавните институции и поголема интеграција во општествениот живот.
-Како надлежно Министерство и како Влада и понатаму ќе спроведуваме проекти со кои континуирано ќе се подобрува животот на овие лица, потенцираше министерот за труд и социјална политика, Диме Спасов.
Неодамна, советниците на ВМРО-ДПМНЕ од Центар побараа да се изградат дактилни патеки за слепите лица на територијата на оваа општина. Во предлогот е наведено дека вакви дактилни патеки треба да се изградат кај „Рајко Жинзифов“, „Иван Милутиновиќ“ и „Костурски херои“. Ваквие патеки ќе го олеснат секојдневието на лицата со оштетен вид.
