Предлог – закон за јавното обвинителство, по скратена постапка, во второ читање, е на дневен ред на денешната седница на собраниската Законодавно – правна комисија.
Членовите на ЗКП ќе го разгледаат и Предлог-закон за изменување и дополнување на Законот за Советот на јавните обвинители на Република Македонија, по скратена постапка, во второ читање.
Во собраниска процедура од денеска се очекува да влезе извештајот на Советот на јавни обвинители за разрешување на специјалната јавна обвинителка Катица Јанева.
Новозибраниот претседател на Советот Ацо Колевски потврди дека уште во четвртокот до законодавниот дом бил испратен извештајот дека се исполнети условите за почнување постапка за разрешување на Јанева, која е во притвор како осомничена за случајот „Рекет“.
Според собраниската процедура, претседателот на собраниската Комисијата за избори и именувања, Илија Димовски, треба да закаже седница на која ќе се одлучува за разрешувањето на Јанева.
Тој во петокот изјави дека штом го добие извештајот ќе пристапи итно во насока на забрзување на постапката.
Се уште не се знае дали за него комисијата ќе расправа зад затворени врати или на јавна седница. Можноста за разгледување зад затворени врати, како што посочуваат од законодавниот дом, е поради сензитивноста на судските истраги кои се уште се во тек.
Евентуалната одлука на Собранието за разрешување на Јанева, согласно процедурата, повторно треба да се најде пред Советот на јавни обвинители.
За потсетување, Јанева е во притвор за случајот Рекет.
