Немилосрдните торнада коишт зафатија делови од Југот и Средниот запад на Соединетите држави предизвикаа смрт на најмалку 10 луѓе, разорија домови и трговски центри и урнале покрив на театарот за време на хеви метал концерт во сојузната држава Илиноис.
Најмалку три лица загинаа во петокот во силно торнадо што ја зафати јужната американска држава Арканзас, а уште по три лица загинаа на север во сојузните држави Илиноис и Индијана како последица на силни грмотевици, соопштија локалните власти.
Во Арканзас две лица загинале во градот Вин, изјави гувернерката Сара Хакаби Сандерс на прес-конференција. Таа рече дека во таа сојузна држава е прогласена вонредна состојба и се распоредени околу стотина припадници на Националната гарда.
„Централниот Арканзас претрпе огромни штети“, напиша таа на Twitter. Покрај тоа, уште едно лице загина во округот Пуласки, каде што се наоѓа главниот град на Арканзас, Литл Рок, погоден од невремето.
Градоначалникот на Литл Рок, Франк Скот, изјави за новинарите дека околу триесетина луѓе биле пренесени во болниците поради различни повреди.
Националната метеоролошка служба (NWS) издаде предупредувања за торнадо во делови од соседните држави – Тенеси, Илиноис, Кентаки и Ајова.
Торнадото зад себе остави вистински пустош – превртени автомобили, откорнати огромни дрвја, скршени телефонски столбови и уништени куќи.
Новинарката од Литл Рок, Лара Фараф, изјави за AFP дека торнадото носи „цели покриви на згради“ и објави фотографии на социјалните мрежи. Во Арканзас, како што пренесуваат локалните медиуми, повеќе од 78.000 луѓе останале без струја.
Во северната држава Илиноис, во градот Белвидер, западно од Чикаго, при минување на силно невреме, се урнал дел од покривот и паднал дел од фасадата на концертната сала Аполо, каде што настапувал хеви метал бенд. исклучен.
Шефот на пожарникарите во Белвидер, Шон Шедл, пријавил еден смртен случај и 28 повредени. Тој додаде дека пет лица се хоспитализирани со многу тешки повреди.
Според локалните медиуми, таму биле мобилизирани повеќе од дваесет возила на брза помош.
Торнада, метеоролошки феномени кои се многу деструктивни и тешко може да се предвидат, се вообичаени во САД, особено во центарот и јужниот дел на земјата.
Пред една недела, торнадо го проби Мисисипи, убивајќи 25 луѓе и предизвикајќи огромна материјална штета. Претседателот Џо Бајден, исто така, ја посети областа во петокот.
Во декември 2021 година, околу осумдесет жители ги загубија животите во повеќе торнада што го погодија Кентаки.
