Димовски: Уставот не дозволува осум заменици министри Албанци, а само шест Македонци

233

Составот на Владата е спротивен на темелните вредности на Уставот на Република Македонија, пишува на Фејсбук Илија Димовски, член на ВМРО-ДПМНЕ и поранешен пратеник.

Не ја сакам оваа тема затоа што верувам дека квалитетот на човекот во извршување на неговите работни задачи не зависи воопшто од неговата етничка припадност, но кога веќе вториот човек на Владата, господинот Артан Груби, ја отвара оваа тема, да ги видиме реалните бројки и да видиме дали тоа е во рамки на Уставот.

Како темелна вредност на државното уредување Уставот на Република Македонија во член 8, алинеја 2 вели и гарантира: “Соодветна и правична застапеност на граѓаните кои припаѓаат на сите заедници во органите на државната власт и другите јавни институции на сите нивоа.”

Во оваа уставна норма има заштита за сите, па и за Македонците и помалите етнички заедници. Составот на Владата е спротивен на Уставот на Република Македонија.

Ако сакаме европски вредности, треба да ги почитуваме еднакво за сите, не само за себе.

Во составот на новата Влада има:

1. Членови (Претседател на Влада и министри): 12 Македонци, 8 Албанци

2. Заменици членови (заменици министри): 8 Албанци, 6 Македонци, 2 Турци

Вкупно: 18 Македонци, 16 Албанци, 2 Турци

Процентуално:

50% Македонци – значително помалку од уставно потребното;

44,44% Албанци – значително повеќе од уставно потребното (на штета на другите);

5, 55% други (само 2 Турци) – дупло помалку од уставно потребното (нема Роми, Срби, Бошњаци и Власи).

Мој предлог до господинот Артан Груби е да покажат големина и на места на четири членови или заменици членови на Владата да ги повлечат своите партиски кадри и да предложат по еден од помалите заедници кои не се претставени во Владата. ДУИ да предложи по еден Влав, Србин, Бошњак и Ром и на тој начин ќе ја обезбеди рамноправната застапеност на помалите етнички заедници, пишува Димовски.

Тоj потенцира дека не сака на СДСМ да им предлага ништо, зошто оваа Влада секако е Влада на ДУИ со Премиер од СДСМ.

Доколку преземете содржина од оваа страница, во целост сте се согласиле со нејзините Услови за користење.