Импровизирани експлозивни направи експлодирале во предградие на Атина пред просториите на навивачите на грчкиот фудбалски великан Панатинаикос, при што е предизвикана само материјална штета без настрадани, известуваа медиумите повикувајќи се на полициски извори.
Две лица на мотоцикл фрлиле експлозивни направи околу четири часот наутро по локално време, откако се приближиле кон просториите на Панатинаикос во квартот Марусија, според снимките од камерата за видеонадзор која ги пренесуваат грчките медиуми.
Осум продавници, седум домови и две возила се оштетени во силната експлозија која одекнала, известува грчката новинска агенција ANA-MPA, повикувајќи се на полициски извори.
Просториите на Панатинаикос, исто така, се оштетени. Скршени се прозорците и оштетена е внатрешноста на објектот и мебелот.
Засега нема уапсени, полицијата отворила истрага, а ова е веќе третпат оваа локација да е цел на сличен напад. Насилствата и судирите меѓу хулиганите, честопати и со криминална заднина, зачестија во грчкиот фудбал.
