Електронско плаќање и на патарината Миладиновци

Патарина на наплатната станица Миладиновци на Коридор 8 од денеска може да се плаќа и по електронски пат со М – картичка. Електронската наплата на таа станица ќе се врши само со М-карт, но не и со М-таг како што е на останатите патарини на Коридорот 10.
Воведувањето електронско плаќање е самостоен проект на Јавното претпријатие за државни патишта (ЈПД).
– За да врши контрола и да се поврзе со системот на потегот Романовце Миладиновци спроведовме проект за електронска наплата на Миладиновци со Факултетот за електротехника и информациски технологии (ФЕИТ) што изработија софтверско и хардверско решение. Направени се тестови и функционира како што треба. На видни места има обележувања дека може да се врши електронска наплата, изјави за МИА Марко Брезовски, раководител на Одделението за наплата на патарини и контрола при ЈПДП.
На почетокот на јули годинава стартуваше електронскиот систем за наплата на патарините Романовце, Отовица, Сопот и Градско на Коридор 10, како и на наплатната станица Петровец, проект што се спроведе со кредит од Европската банка за обнова и развој.

Доколку преземете содржина од оваа страница, во целост сте се согласиле со нејзините Услови за користење.