Елмас претставен во Наполи: Ова е остварување на сонот, не ме плашат Роналдо и Јуве

76

Македонскиот фудбалски репрезентативец Елиф Елмас официјално денеска беше претставен како нов играч на Наполи.

Елмас пред два дена го комплетираше трансферот и го избра дресот со број 12.

„Го избрав бројот 12 бидејќи сакам да бидам посебен. Среќен сум што сум тука, бев одлично пречекан од сите соиграчи. Веќе се чувствувам како дома во Неапол, има фамилијарна атмосфера. Пандев ми рече да го ценам овој дрес, знам за колку важен тим се работи. Ми кажа дека ќе имам поддршка од соиграчите, и тоа е важно за мене“, истакна Елмас.

„Сон е да тренираш под водство на Карло Анчелоти. Тој има се што еден тренер треба да има. Неговиот телефонски повик за време на преговорите многу значеше во одлуката да се преселам тука“, истакна Македонецот, па на крај даде коментар за најголемиот ривал, Јувентус.

„Јасно е дека името на Роналдо во светот на фудбалот има тежина, но за мене нема вредност, не ме плаши. Знам за ривалството меѓу Наполи и Јувентус, ми објаснија. Тоа се два многу силни тимови, ќе биде убаво да се игра против Јувентус. Но да почекаме да се случи“, изјави Елмас.

 

Доколку преземете содржина од оваа страница, во целост сте се согласиле со нејзините Услови за користење.