Европската служба за надворешни работи ја осуди новата најава на израелските власти дека одобрува градба на две илјади нови станбени проекти на окупираниот Западен Брег, кој е палестинска територија.
– Позицијата на Европската Унија за израелската политика на населување во окупираната палестинска територија е јасна и останува непроменета: целата активност на населување е нелегална според меѓународното право и ја поткопува одржливоста на решението на две држави и изгледите за траен мир, како што потврдува резолуцијата 2334 на Советот за безбедност на ОН, стои во реакцијата на европската дипломатија.
Унијата воедно го осудува и одобрувањето на израелските власти за изградба на нов тунелски пат кој го заобиколува Витлеем на запад.
– Прогресивната изградба на посебна патна мрежа, која ги поврзува населбите и излезните места едни кон други како и кон патната мрежа во Израел, заобиколувајќи ги палестинските градови и заедници, претставува вкоренување на фрагментацијата на Западниот Брег. ЕУ го повикува Израел да стави крај на целата активност на населување, согласно нејзините обврски како окупаторска моќ, порачува Европската Унија.
