На европските берзи во средата претпладнето најважните индекси повторно пораснаа, втор ден со ред, по растот на другите светски берзи што следеше по големата корекција во понеделникот.
Паневропскиот индекс Stoxx 600 во првиот дневен пресек од тргувањето порасна за 0,72 отсто, при што најголем дел од берзанските сектори пораснаа, а најмногу банкарството, за 1,27 отсто. Истовремено, франкфуртски DAX зајакна за 0,64 отсто, на 17.467 поени, лондонски Ftse за 0,98 отсто, на 8.105 поени, а париски CAC за 0,8 отсто, на 7.187 поени.
Меѓу позначајните добитници, се издвојува акцијата на „Continental“, со пораст на цената од 5 отсто, откако производителот на автомобилски делови ги надмина очекувањата на пазарот со своите оперативни резултати.
Но, фармацевтскиот сектор беше најголемиот губитник, со просечен пад на цената од 0,7 отсто, под влијание на корекција од 7 отсто на цената на акцијата на „Novo Nordisk“. Производителот на лекови за слабеење, меѓу другото, објави нето добивка од 2,93 милијарди долари во вториот квартал, што е под очекувањата на аналитичарите, а исто така ги намали прогнозите за раст на приходите за оваа година.
Најголем губитник, од друга страна, беше акцијата на „Puma“, со пад на цената од 12,5 отсто, бидејќи германскиот производител на спортска опрема ги намали изгледите за основната добивка оваа година.
На Токиската берза индексот Nikkei го заврши тргувањето во средата со раст од 1,19 отсто, на 35.089 поени.
