Додека следната седмица се очекува во земјата да пристигнат 500.000 дози на кинеска вакцина како и на американската Pfizer, бројот граѓани заинтересирани за вакцинација не е значително зголемен.
Во моментов 180 илјади граѓани чекаат за вакцинација. Министерот за здравство Филипче најави интензивна кампања, како и теренска вакцинација во области каде што интересот за вакцинација е мал.
Дел од анкетираните граѓани велат дека досега не се пријавиле токму поради недостиг од вакцини.
„Нема доволно вакцини, чекаме да пристигнат вакцините и да се пријавиме. Веднаш штом ќе пристигнат вакцините, ќе се пријавиме“, вели еден граѓанин.
Некои се пријавиле и чекаат да бидат имунизирани.
„Се пријавив за вакцинација. Пред месец и половина, но сѐ уште нема одговор“…
„Се пријавив пред месец и половина, чекаме, ако не повикаат ќе одиме и ќе се вакцинираме. Мислам дека нема вакцини, бидејќи ако имаше ќе нѐ повикаа“, додаваат граѓаните.
Вакцинираните граѓани препорачуваат сите граѓани да бидат вакцинирани.
„Јас им препорачав на сите да се пријават и да ја земат вакцината“, вели еден наш сограѓанин.
Министерот Филипче смета дека до крајот на летото ќе се постигне колективен имунитет, каде 70% од граѓаните се очекува да бидат вакцинирани со две дози.