Франција е подготвена за протестот подоцна во саботата, на неформалното движење „Жолтите елеци“, кое од протест против зголемувањето на давачките за горивата прерасна во сеопошт бунт против претседателот Емануел Макрон, поставени се кордони, откажани се фудбалските и други спортски натпревари, а според најавата, на улиците ќе има и оклопни возила, а утрото се приведени превентивно 32 лица.
„Жолтите елеци“ го закажаа денешниот протест, бидејќи сметаат дека отстатпките на владата се недоволни..
Францускиот премиер Едуар Филип во петокот изјави дека 89.000 припадници на безбедностите сили ќе бидат распоредени ширум земјата. Според него, од 89.000 припадници на безбедносните сили, 8.000 ќе бидат распоредени во Париз, како и оклопни возила.
„Се соочуваме со луѓе кои не се тука за да протестираат, туку за да кршат, и сакаме да се снабдиме со средства кои ќе ги спречат да дивеат“, рече Филип.
Во Париз вчера сите се подготвуваа за четвртиот викенд на протести на „Ќолтите елеци“. Британскиот весник The Guardian објави дека банките, продавниците и рестораните се подготвувале да ги заштитат сопствените деловни објекти пред денешните протести. Централната банка на Франција постави даски на прозорците, а славната Операта ги заклучи инструментите поради страв од провала.
Париските власти советуваат контејнерите за отпад да се отстранат, за да не бидат запалени. Денеска е затворена за посетители и Ајфеловата кула, додека во Бордо се затворени десетици јавни места.
Американската амбасада во Париз ги предупреди своите државјани на можни насилства за време на протестите и ги советува да ги избегнуваат демонстрациите. Амбасадата предупредува дека протестите можат повторно да станат насилни и оти полицијата може повторно да одговори со водени топови и солзавец. Во минатонеделните протести беа повредени повеќе од 130 лица, а над 400 се уапсени во најлошите улични немири во Франција во последните децении.
Триесет и две лица утрово се превентивно притворени во Париз, пред денешниот протест, a pриведувањето на овие лица е поради сомневање дека се подготвувале да учествуваат на насилнички протести.
Рано изутринава, министерот за внатрешни работи Кристоф Кастанер изврши проверка на безбедносните сили распоредени на улиците во Париз, каде по првпат се појавија и оклопни борбени возила на жандармеријата.
Изутринава на главната артерија во Париз, Елисејските полјани, веќе се забележуваат приврзаници на „Жолтите елеци“, но само откако ги поминаа филтрите на полицијата, која врши претрес. „Жолтите елеци“ повикаа на протести и на кружниот-периферен автопат околу Париз, а се најавува силна мобилизација и во другите градови во Франција.
Движењето „Жолти елеци“ започна како протест против предлогот за зголемување на даноците за дизел и бензин, а движењето беше именувано по жолтите елеци што демонстрантите ги носат, а кои возачите мора да ги имаат во своите автомобили. Сепак, протестите наскоро ја надминаа својата првична цел и станаа насочени против Владата. Демонстрантите го насочија својот гнев кон претседателот Емануел Макрон, обвинет дека изгубил допир со реалноста. Демонстрантите за Владата велат дека е елита, која нема поим како живее остатокот од земјата.
