Французите се дигнаа против мерките на Макрон

Илјадници граѓани маршираа низ цела Франција во знак на протест против плановите на претседателот Емануел Макрон да воведе задолжителна вакцинација на здравствените работници и сертификати за вакцинација при влегување во кафулиња, ресторани и кина.

Макрон најави нови мерки оваа недела со цел земјата да се справи со драстичното зголемување на бројот на новозаразени, додека демонстрантите велат дека мора да се почитува слободата на избор на оние кои не сакаат вакцинација, пренесе Ројтерс.

Новите мерки веќе предизвикаа демонстрации на почетокот на оваа недела, поради што полицијата употреби солзавец за да ги растера насобраните.

Протестите се одржаа во Париз, Марсеј, Лион, Лил и некои други помали центри, а се вклучија демонстранти со „жолти елеци“, кои, според Ројтерс, се обиделе да ги оживеат антивладините протести што се случија за време на „заклучувањето“.

И покрај силата на протестот, агенцијата за стратешко истражување Ipsos-Sopra Steria во петокот објави дека повеќе од 60 проценти од Французите се согласуваат со задолжителната вакцинација на здравствените работници, како и со задолжителните сертификати за вакцинација на некои јавни места.

Доколку преземете содржина од оваа страница, во целост сте се согласиле со нејзините Услови за користење.