ГДУ смета дека иницијативата за свикување на парламентот има скриена намера за брзи избори

Иницијатива за свикување на Собранието со скриена намера за брзи избори летово. Па веднаш потоа барање за лидерска средба да се видело која била суштината на иницијативата и да се поразговарало за политичките процеси. Ете што ни сервираат Мицкоски и Заев, по олабавувањето на полицискиот час, жесток политички час, реагираше во понеделникот Граѓанско-демократската унија (ГДУ).

„Наводното привременото примирје заврши. И тоа среде пандемија додека броиме заразени, жртви, излечени. Додека се бориме да го победиме опасниот вирус, а развиените земји се обидуваат да пронајдат вакцина, нашите „големи“ политичари се фатија за изборите. По којзнае кој пат лицемерието е покажано на дело. Па впрочем и двајцата лидери уште кога беа во самоизолација, не поминуваше ден, а да не го искористат Фејсбук да кажат нешто. Пуста желба рефлекторите да се свртат кон нив“, рече вели Дарко Попоски, портпаролот на ГДУ на прес-конференција.

Според Попоски, јавноста повторно е сведок на веќе виденото, односно дека „СДСМ и ДПМНЕ се надмудруваат, се препукуваат кој повеќе се грижи за здравјето на граѓаните, кој ќе прави преседан, а ДУИ само немо набљудува, зашто во нивни раце се иницијативата и одлуката“.

Од ГДУ предупредуваат дека во моментов не е време за политички игри и калкулации.

„Ова е борба во која сите треба да бидеме обединети, со цел да се заузда невидливиот непријател. Не ни треба дефокус. Датумот за избори треба со консензус да го одредат сите политички чинители во оваа земја. Но повторуваме, за тоа кога ќе бидеме подготвени како држава. Сѐ спротивно од ова само ќе ја зголеми конфликтноста во општеството“, заклучи Попоски.

Доколку преземете содржина од оваа страница, во целост сте се согласиле со нејзините Услови за користење.