Претставниците на германската федерална и провинциска влада одлучија да ги продолжат тековните строги мерки на затворање во борбата против вирусот корона до 7 март, со некои отстапки, како што е отворањето на фризерски салони на почетокот на март.
„Ситуацијата со инциденцата е подобрена од последниот состанок. Сакам да им се заблагодарам на граѓаните за однесувањето да придонесат за подобрување на состојбата. Сепак, ние сакаме дополнително да ја намалиме инциденцата и затоа да продолжиме со сегашните мерки “, рече германската канцеларка Ангела Меркел по видео-конференцијата со премиерите на сојузните држави.
Таа посочи дека во моментов најважно е да се спречи ширењето на мутираните соеви на вирусот што се појавија во Германија, пренесува Танјуг.
„Понатамошните мерки се поврзани со мутациите на вирусот чие ширење мора да го спречиме по секоја цена. Многу е важно да го следиме развојот на нивното ширење до средината на март, за да нема трет бран“, рече Меркел.
