Ги отвораме перспективите за продлабочување на економската соработка со Кина

Премиерот Зоран Заев и владината делегација оствари средба со Претседателот на Владата на Народна Република Кина, Ли Кечијанг и кинеската владина делегација на маргините на Седмиот Самит на шефови на влади од процесот за соработка на Народна Република Кина со земјите од Централна и Источна Европа (16+1).  Заев ја потенцирал важноста на поддршката која што во континуитет Кина и ја пружа на Македонија од независноста до денес и нагласи дека Македонија продолжува да ја поддржува политиката на една Кина.

Сакаме да ги отвориме перспективите за продлабочување на економската соработка со Народна Република Кина и да соработуваме на проекти кои ќе придонесат за инфраструктурен и економски развој на земјата.“ истакна премиерот Заев кој рече дека е многу значајна поддршката што кинеската влада ја пружа во напорите за забрзување на изградбата на двата автопати, Кичево- Охрид и Миладиновци-Штип, изјави Заев.

Според него, процесот за воспоставување на безвизен режим меѓу двете земји е во завршна фаза и во тој дух посочи дека очекува да се зголеми движењето и комуникацијата помеѓу граѓаните на двете земји што ќе резултира со развој на туризмот, поголема културна соработка, поврзување и воспоставување на поблиски релации.

Кинескиот премиер Кечијанг изрази силна поддршка за чекорите што македонската влада ги прави во насока на подобрување на животниот стандард на граѓаните и политиките за забрзување на економскиот раст.

Тој порача дека Кина ќе продолжи и понатаму да ја поддржува Македонија и истакна дека зголемувањето на соработката е многу важно бидејќи дека двете земји се насочени кон економски развој кој треба да придонесе кон подобрување на животниот стандард на граѓаните.

На крајот од средбата премиерот Заев порача дека Македонија останува голем пријател на Кина и изрази силно уверување дека билатералните односи меѓу двете пријателски земји ќе се унапредуваат и развиваат во позитивна насока.

 

 

Доколку преземете содржина од оваа страница, во целост сте се согласиле со нејзините Услови за користење.