Четири часа во пламен беше полето околу атарот на кочанското селото Мојанци блиску до пречистителната станица за отпад, а противпожарната единица успеа да ги локализира пламените јазици, јавува МИА. Со помош од граѓаните, но и волонтерите од Доброволното противпожарно друштво од Кочани беше спречена поголема катастрофа.
– Дојава за пожарот добивме околу пладне и дури по 16 часот, со натчовечки напори, успеавме да го спречиме ширењето на огнот од оризовите површини кон пречистителната станица. Во еден момент пламените јазици практично беа во кругот на станицата, а голема опасност претставуваше тоа што таму се наоѓа и резервоар со метан, што можеше да предизвика катастрофални последици. На одделни места огнот сè уште гори, а во гаснењето помогна и дождот што почна да паѓа доцна попладнево – истакна Владо Јефтимов, командир на одделение во ТППЕ – Кочани.
Причина за неконтролираното ширење на огнот е палењето на стрништата во нивите по завршувањето на жетвата на оризот. Поради тоа, од Противпожарната единица ги повикаа земјоделците да прекинат со неодговорното однесување за да се спречат големи материјални штети и загрозувањето на безбедноста на луѓето.