Грк уапсен со над 100 килограми канабис и казнет за прекршување на забраната за движење

Грчката полиција уапсила 58-годишен Грк за поседување и пренесување на 100,9 килограми канабис, а дополнително му била изречена и казна од 300 евра за прекршување на мерките за забрана на движењето, јави дописничката на МИА од Атина.

За време на сообраќајна контрола кај патарина на 30 километри од Солун, во автомобилот на уапсениот, била откриена дрогата спакувана во 11 пакети.

Од спроведената истрага, како што соопштија од грчката полиција, се утврдило дека канабисот бил наменет за регионот на Еврос, односно за снабдување на корисници на дрога, а 58-годишниот требало да го пренесе од Солун за што добил и паричен надомест.

Полицијата ги конфискувала канабисот и возилото, а уапсениот освен што ќе одговара пред јавен обвинител за дрогата, ќе треба да плати и казна од 300 евра за прекршување на законот за забрана за движење од една во друга регионална единица.

Доколку преземете содржина од оваа страница, во целост сте се согласиле со нејзините Услови за користење.