Груби порача дека ДУИ е за избори и очекува апсолутна победа

Водечката албанска партија во Македонија, Демократската унија за интеграции (ДУИ) со нетрпение ги очекува изборите и следната победа, изјави во вторникот во Собранието пратеникот  Артан Груби.

Убедени сме во апсолутна победа, посебно кај албанскиот блок и дека ќе станеме пресуден, одлучувачки фактор за формирање на следната влада и ќе бидеме гарант за трите договори, Охридскиот, Преспанскиот и Добрососедскиот, како и за реализација на програмата, истакна Груби.

Пратеникот уште еднаш потенцираше дека ДУИ се залага за одржување на предвремените парламентарни избори во договорениот рок, 12-ти април.

Ние сме за избори. Ги очекуваме изборите, спремни сме, реформирани и готови да ја преземеме повторно одговорноста од граѓаните за реализација на нивните очекувања. Исто така, ги поддржуваме сите законски решенија, било да е тоа Законот за Армијата, Законот за ЈО, па дури и инкорпорирањето на препораките од ОДИХР и ОБСЕ во Изборниот законик кои би сакале да се усвојат во текот на јануари, по изборот на преодната влада, која ќе треба да ги организира изборите, рече Груби.

Очекува дека ова Собрание ќе го ратификува Протоколот за членство на земјата во НАТО и изрази надеж дека шпанските пратеници ќе успеат да го завршат процесот на ратификација на Протоколот до 12 февруари.

Прашан за денешната изјава на премиерот Заев за можно одложување на изборите доколку не се донесат суштинските закони, Груби рече дека ако има политичка волја и дијалог меѓу политичките партии ништо не би било пречка и сите закони можат да се усвојат во краток можен рок.

Најважни се законите кои претходно ги спомнав и јас сум убеден дека со дијалог може да постигнеме решение за сите тие прашања затоа што и датумот кој го определивме за избори беше консензуално донесен кај претседателот Пендаровски. И затоа консензуално треба да се решаваат битните прашања, како што е Изборниот законик, датумот за избори, вклучително и ратификацијата на Протоколот за членство во НАТО, рече Груби.

Прашан што ќе се случи ако премиерот Заев побара од нив како коалициски партнер одложување на изборите, Груби рече дека тоа е хипотетичко прашање. Тој повтори дека се убедени во нивната победа и ако изборите бидат утре или на 12 април или кога било, ДУИ, како што рече, ќе биде апсолутен победник на овие избори. 

Доколку преземете содржина од оваа страница, во целост сте се согласиле со нејзините Услови за користење.