Со двајцата нови министри за привлекување на инвестиции, Висар Фида и Горан Мицковски, премиерот Никола Груевски најавува најсилен фокус досега на отворање на нови работни места.
Горан Мицковски е нов министер за странски инвестиции во Владата на Република Македонија. Мицковски е финансиски експерт со долгогодишно меѓународно искуство. Работел на високи позиции во големи меѓународни банки.
На новата функција ќе дојде од Лондон каде во моментов е ангажиран во Credit Suisse AG, како консултант за инвестициско банкарство и стратегиски трансакции. Претходно работел во Sidley Austin LLP, The Royal bank of Scotland и уште неколку британски и автралиски банки.
Мицковски има дипломирано на Правниот факултет во Скопје, а диплома зел и од Мелбурн, Австралија. Новиот министер зборува неколку јазици и има неколку државјанства. Со неговото назначување, владејачката ВМРО-ДПМНЕ уште еднаш ја продолжи традицијата за ангажирање на непартиски кадри кои се докажале во своите сектори.
Покрај Мицковски, задолжен за привлекување на инвестиции директно ќе биде и досегашниот Директор на Агенцијата за странски инвестиции, Висар Фида. Со двајцата нови министри за привлекување на инвестиции, премиерот Никола Груевски најавува најсилен фокус досега на отворање на нови работни места.
Груевски денеска до Собранието го достави предлогот за новиот состав и програмата. Во новиот владин состав има 11 нови министри и тоа Зоран Јолевски, Аднан Јашари, Беким Незири, Абдулаким Адеми, Михаил Цветков, Лирим Шабани, Нурхан Изеири, Фурхан Чако, Висар Фида и Горан Мицковски.
Зоран Јолевски е новиот министер за одбрана, Зоран Ставрески останува вицепремиер и министер за финансии, а Никола Попоски и натаму ќе биде на чело на министерството за надворешни работи.
Никола Тодоров останува министер за здравство, Диме Спасов и натаму ќе биде министер за труд и социјална политика, а со МЗШВ ќе раководи Михаил Цветков.
Министер за информатичко општество и администрација останува Иво Ивановски.На своите досегашни функции остануваат и Елизабета Канческа Милевска, Миле Јанакиески, Гордана Јанкулоска, Владимир Пешевски.