На неколку часа пред завршувањето на изборната кампања, претседателот на ВМРО-ДПМНЕ Никола Груевски одржа прес конференција и истакна дека за него денешниот ден, бил пријатен бидејќи се сретнал со два крупни инвеститори кои деновиве објавија отворање на огромен број на нови работни места во Македонија и кои му ги презентирале нивните понатамошните планови.Сепак неговото обраќање е со цел да се обрати до сите граѓани и уште еднаш да ги повика, масовно да излезат и да гласаат за онаа политичка опција во која веруваат и која ја поддржуваат, опцијата која веруваат дека ќе донесе најмногу успеси и напредок на Македонија, без притоа да прифаќаат нечиј притисоци, уцени или закани, во случај да ги има.
„Во недела пред сите нас партиите и политичарите, треба да победи Македонија. Треба да победи демократијата.Зад параванот секој е сам и само тој одлучува за кого ќе гласа и кому ќе му ја довери својата доверба и тоа е само негово право и ничије друго и не е обврзан никому да му дава отчет или информација за неговото право. Гласањето е тајно, одлуката ја носи народот.Деновиве и до мене допреа информациите од различни загрижени граѓани, дел од нив членови на СДСМ, за деструктивното сценарио кое се разгледувало од страна на Заев и неколкумина негови соработници, за свесно и намерно креирање проблеми во изборниот процес во недела, кои би биле алиби за поголем број поплаки до ДИК, а тоа пак алиби во текот на изборниот ден да издадат наредба нивните претставници да ги напуштат гласачките места,“ изјавиу Груевски и додаде дека реализацијата на едно вакво сценарио би и направило голема штета на Македонија и на целиот народ, не само на патот на евроатланските и европски интеграции, туку и на економски и секаков друг план.
Тоа сценарио,според него може да го посакува само некој кој не и мисли добро на Македонија.
„Последиците би биле далекусежни. Според толкувањата мотив за ова би била намерата на Зоран Заев да не ги признае изборите, што и се наслутува од денешната негова прес конференција, со цел да остане претседател на СДСМ.Јас не се мешам во тоа дали тој или друг ќе биде претседател на СДСМ, но апелирам, таа битка да не биде на грбот на народот и на грбот на државата. Впрочем ВМРО-ДПМНЕ се согласи и ги прифати сите можни барања на СДСМ за промена и прилагодување на изборниот закон со цел да имаме мирни, фер и демократски избори како што заслужува и посакува секој во државата,“ изјави Груевски и додаде дека ВМРО-ДПМНЕ и институциите во државата ќе направат се што е потребно и е согласно закон, да се обезбеди мирен изборен ден, на кој народот слободно и демократски ќе ја изрази својата волја.
Тој е убеден дека сите граѓани во државата ќе допринесат кон тоа, со масовно излегување и искажување на сопствената волја. Недела нека биде празник на демократијата. Во недела вечер најголемиот победник да биде Македонија и сите граѓани во неа.
