Опасните европски практики за рециклирање пластичен отпад во Турција му штетат на здравјето на многу луѓе, вклучително и на децата, и ја деградираат животната средина, предупреди Human Rights Watch (Хјуман рајтс воч-ХРВ).
Најбогатите европски земји го испраќаат своето ѓубре во Турција, изложувајќи ги некои од најранливите заедници во Турција, вклучувајќи ги децата, бегалците и мигрантите, на сериозни еколошки и здравствени ризици, се вели во извештајот на ХРВ од 88 страници објавен во средата.
Загадувачите на воздухот и токсините што се ослободуваат за време на рециклирањето влијаат на работниците и луѓето кои живеат во близина на капацитетите за рециклирање, посочува ХРВ, додавајќи дека „неефикасните“ мерки на турската влада го зголемуваат проблемот.
Извештајот е подготвен врз основа на интервјуа со најмногу 60 луѓе во големите турски градови како Истанбул и Адана. Турското Министерство за животна средина не беше достапно за коментар, според ДПА. Откако Кина го забрани увозот на пластичен отпад во 2018 година, Турција стана примарна дестинација за пластичен отпад од ЕУ.
Турција сочинува речиси половина од извозот на пластичен отпад на ЕУ во 2020 и 2021 година, според податоците на ХРВ. Таа прими приближно 450.000 тони отпад од ЕУ во 2020 година, изјави во средата за ДПА експертот за ХРВ, Криста Шенум, додавајќи дека Германија е една од најголемите извознички земји од Унијата.
ЕУ и поединечните земји извозници на пластика треба „да го прекинат извозот на пластика во Турција и генерално да ја намалат количината на пластика што ја произведуваат и консумираат“, додаде Шенум.
